Алпинизмот е спорт што се практикува на стрмни и високи карпи и е дел од семејството планинарски спортови. Во основа, тој подразбира искачување по природни карпи без претходно поставени ознаки или целосно обезбедување, со задржување на автентичниот природен изглед.Успешните искачувања зависат не само од физичката сила и техника, туку и од способноста на алпинистот за поставување сопствено обезбедување, правилна ориентација и избор на насока, како и проценка на временските услови. Повеќето алпинистички локации се наоѓаат во планински региони, што бара солидно познавање на основните планинарски вештини.
Почетоците на Македонската Алпинистичка Федерација како официјална организација на македонскиот алпинизам датираат од крајот на шеесеттите години. Во тој период, со формирањето на првото алпинистичко друштво „Матка“ при Планинарскиот сојуз на Македонија, била создадена Комисијата за алпинизам. Во раните осумдесетти, со започнување на програма за македонски алпинистички експедиции, Комисијата добива ново име – Комисија за алпинизам и експедиции
Во Македонија, алпинизмот се практикува преку алпинистички клубови, организирани под Македонската Алпинистичка Федерација. Специфичноста на овој спорт и неговата опасност доведоа до строги регулативи и правилници, кои ги одредуваат стандардите за обука и лиценцирање на инструктори, што е задолжително за изведување на алпинистичките тренинзи.
Со цел да го доближи алпинизмот до пошироката јавност, Федерацијата организира презентации, трибини и отворени денови на алпинистичките собири, нудејќи стручни информации и совети за сите заинтересирани.
Благодарение на ридско-планинскиот релјеф, Македонија има значителен број на локации погодни за алпинизам. Со растот на интересот за овој спорт, се зголемува и бројот на локалитети за искачување.
Матка
Матка, алпинистички и спортско качувачки центар во близина на Скопје, е позната по своите карпи на кањонот на реката Треска. Лесно достапна по асфалтен пат, Матка нуди сместување во планинарски дом, како и опции за кампување. Со над 40 алпинистички и 30 спортски насоки, Матка е идеална за качување од март до јуни и од септември до ноември.
Демир Капија
Демир Капија, со карпа од висококвалитетен варовник, нуди долги насоки од 200 до 300 метри и богати можности за спортско качување. Достапна е преку автопат или патека од населбата Демир Капија. Кампување е можно крај реката Вардар, а најповолен период за качување е од март до јуни и од септември до ноември.
Лешница
Сместена на Шар Планина, Лешница е популарна за зимски алпинизам и екстремно скијање, со снежни услови од ноември до мај. Најдобриот приод во зима е од Попова Шапка, а сместувањето е во локални објекти и бачила.
Солунска Глава
Солунска Глава, со карпи високи до 700 метри, е предизвик за искусни алпинисти. Најдобриот пристап е од планинарскиот дом Чеплез, од каде се стигнува пешки до карпата.
користена литература: https://macf.mk/
