4×4 спортот е активност која вклучува возење на специјализирани теренски возила по неасфалтирани и тешко пристапни терени. Овој спорт не бара само техничка вештина, туку и познавање на механиката на возилото, што е клучно за успешно совладување на тешките терени. Ова хоби е совршена комбинација на авантуристичка активност и предизвик за возачите, кои мораат да се прилагодат на различни теренски услови и да демонстрираат способност за маневрирање во најтешки ситуации..
Оф-роад возењето се одвива на различни терени, како што се калливи патеки, стрмни планински падини, реки, камени и песочни површини, па дури и недопрени шумски патишта. Возачите мораат да бидат внимателни на секој чекор, бидејќи лесно може да се заглават во тешките услови. За оваа активност се користат специјализирани теренски возила, познати како off-road возила. Овие возила се дизајнирани да совладуваат тешки и непристапни терени.
Оф-роад спортот почнува да се развива во Македонија во 90-те години, кога се формираат првите групи љубители на теренски возила, кои започнуваат да ги истражуваат непристапните. Со текот на времето, оф-роад спортот во Македонија се проширува, а денес постојат неколку активни клубови и организации кои организираат настани и натпревари, привлекувајќи учесници од Македонија и соседството.
Еден од најпопуларните адреналински настани е Macedonian 4×4 Trophy, кој привлекува љубители на теренските возила. Се одржува еднаш годишно и има за цел да го истражи природниот потенцијал на Македонија преку возење во диви и непристапни терени.
Оваа година, Macedonian 4×4 Trophy се одржа во Крушево и привлече голем број учесници и посетители од целиот регион. Организацијата се покажа на високо ниво, со внимателно испланирани рути низ непристапните терени околу Крушево, кои претставуваа вистински предизвик за сите тимови и возила.
Вообичаено, настанот трае неколку дена и опфаќа различни рути низ планините. Учесниците ги преминуваат тешко достапните терени, тестирајќи ги своите возачки способности и издржливоста на своите теренски возила. Многу од учесниците се дел од локални и меѓународни клубови. Оваа авантура игра важна улога во промоцијата на македонскиот туризам, привлекувајќи странски учесници кои првпат се запознаваат со природните убавини на Македонија.
Македонија е вистинска дестинација за сите љубители на off-road возењето кои сакаат да истражуваат недопрената природа.
